البسمة نتاعنا رايحة ترجع..... هام للجميع

السلام عليكم و رحمة الله تعالى وبركاته
اليوم كان أول لقاء لمنتخبنا الوطني و إنهزم فيه رغم الأداء الطيب....في موضوعي هذا ما نيش حاب نتطرق لأسباب الهزيمة لأن الشي إللي فات راهو فات....غزال راهو أخذ بطاقة حمراء.....و شاوشي دخل عنو هدف ساهل..... و هاذي أمور ممكن تحدث في أي منتخب.....إللي حاب نركز عليه هو الحالة النفسية نتاع الشعب الجزايري بعد اللقاء بصفة عامة و أعضاء المنتدى بصفة خاصة .....و حاب نوضح بعض النقاط المهمة في هذا الموضوع.

المهم اليوم خسرنا و أنا واحد من الناس كنت من أشد المتأثرين بهذه الهزيمة خاصة و أنها جات من بعد....... و كامل أعضاء المنتدى ما قدروش حتى يتكلموا و منهم حتى إللي ما قدرش يدخل للمنتدى من شدة الصدمة........ الشيئ الأساسي إللي حبيت نوضحو خاوتي أن لازم علينا كلنا نذكر كيفاه كنا قبل عامين التأهل لكأس إفرقيا نحلمو بيه و اليوم و الحمد لله قدرنا ربي و رانا نشاهد في علامنا يرفرف في المونديال و نشيدنا يعزف و رانا نقارعو في أكبر المنتخبات في هذا المحفل الدولي الكبير..... و اليوم كثير من أشقائنا راهم حاسدينا على المكانة نتاعنا و راهم يتمناو حتى الخسارة نتاعنا و راكم كامل عارفين واش راني نقصد....... يعني رانا اليوم في حلم إسمو كأس العالم و لازم علينا نأخذ الأمور بنظرة إيجابية و نستمتع بكل لحظة في أهم محفل رياضي و ما نخليوش هزيمة تنغص من الفرحة نتاعنا ولا تخلينا نتشاؤم.......أنا متأكد أن كل أعضاء المنتدى يعيشو أول مونديال ليهم و الشيئ الأهم أنه ممكن رايح يكون آخر مونديال لينا و على هذا لازم نفرحوا و نتفاؤلو و نعيشو كل لحظة من هذا الحلم بفرحة و سعادة مهما كانت النتيجة.....و يكفينا فخرا أننا يوم الجمعة إن شاء الله رايحين نقابلو المنتخب الانجليزي إللي يوجد بيه أكبر النجوم العالميين في الكرة و لما لا نخلقولهم صعوبات و إذا كتب ربي حتى الفوز أو التعادل أو على الأقل لقاء في القمة يعني لازم علينا نتفاؤلو و نكونو فرحانين بمنتخبنا.....و من بعد رايحين نتلقاو أمريكا و إن شاء الله نكونو على الأقل أحد أسباب إقصائها إذا ما تأهلناش...........فإذا كنا حنا مجرد مناصرين و ما قدرناش نتحملو الهزيمة فكيف ننتظر من سعدان يرجع اللاعبين إلى روحهم المعنوية الأولى أمام الانجليز المهم إن شاء الله يكون في عونك يا الشيخ سعدان و كامل اللاعبين.

المهم الشيئ إللي حبيت نركز عليه خاوتي أن هذا هو المونديال نتاعنا الأول و ممكن رايح يكون الأخير .....و على هذا لازم علينا نعيشوه لحظة لحظة و نتمتع بمشاهدة لاعبينا في المستوى العالي أمام روني و جريراد و بقية النجوم......و إذا عاد ربي مكتب لينا التأهل واحد ما رايح ينحيه و إذا كان العكس عمرنا ما رايحين نديوه.....نتمنى أنكم فهمتو قصدي و أن البسمة ترجع لوجوهكم و عسى أن تكرهوا شيئا و هو خير لكم....و نتذكر بالأمس مالاوي أشد المتفائلين ما كانش يتوقع تأهلنا نقول هذا الكلام و أنا علابالي بحجم الفرق بين المنافستين لكن لازم علينا ما نفقدوش نكهة مشاركة منتخبنا في المونديال بعد غياب دام 24 سنة