مع أخبار منتخبنا الوطني...

في البداية سعدان إجتمع بالاعبين و بدأ يتكلم معاهم بنوع من الجدية و التقلاق ظاهر عليه...........ياجماعة الماتش نتاع نهار اليوم طري زامبورتو رحمة على والديكم ما تبهدلونيش من ماتش مصر و حنا نخسرو غير بالربعة و الثلاثة حتى الشعب نسى طعم نتاع الربحة و نتوما ثاني نسيتوه و على هاذيك لازم اليوم نفكرو شعبنا و أنفسنا بطعم الفوز و باه ندخلو المونديال بمعنويات مرتفعة و ما نخليوش العدية يتشفاو فيا.....و من بعد بدأ سعدان يبكي في جو مؤثر حتى يخلي اللاعبين يحسو بحجم المسؤولية في هاذ الأحيان صايفي كالعادة فايق بزاف خرج البورطابل نتاعو و دار موسيقى تركية حزينة المهم جو نتاع مسلسل درامي.......

الآن رايح نوصفلكم الحوار بين سعدان و لاعبيه و حالة اللاعبين

شاوشي كل اللاعبين كانو مركزين و متأثرين مي شاوشي غير يضحك و يدير في الطوايش خاصة للعيفاوي مسكين لدرجة أن العيفاوي ندم كي جا للتربص ..... و من باعد خزر فيهم سعدان خزرة فكرتني بالخزرة نتاع عثمان عريوات في فيلم كرنفال في دشرة و قاللهم بنبرة حادة..... يخي راكم كبار أيا بركيونا من لعب الذراري....... العيفاوي حشم مي شاوشي و الله ما علابالو وين راهي صادة و كمل يضحك و يضحك........

و من باعد سعدان بدأ يقول في القايمة نتاع اللاعبين الأساسيين
منصوري غير قال إسم منصوري الكل إنفجر بالضحك و كأنه قال نكتة منصوري تقلق و بدا يطير و يقوللهم واش راه يضحك فيكم واشكون إللي يلعب كيما أن.... ومن باعد تقلق منصوري و جا طالع للشومبرة نتاعو....... هو عاد في نص الطريق جا مولي...... الكل حار و علاه ولى منصوري قاللهم نسيت بللي زاوي موالف كي نغضب يرجعني كي لحقت لنص طريق تفكرت ماهوش هنا... و من باعد خزر في غزال لقاه يتمتم في وذن جبور و يقلو ما علابالوش بللي راه هنا غير كي عاد مقادرو الشيخ و من باعد بداو يضحكو.....و من باعد صايفي فهمها قال ل منصوري راهم يمعنو عليك و يبدا منصوري يعيط عليهم تضحكو عليا قداه عندكم ما مريكتوش يخي غير سلامة الديفونس نتاعنا ...... و من باعد قال المهم يعطيك الصحة الشيخ أنت دايما تقدر في المجهودات نتاعي.

و من باعد دار الشيخ لبوقرة و قالو بوقرة نعرفك راجل و على هاذيك لازم تعرف بللي لاعب الامارات إسماعيل مطر يلعب نفس طريقة نتاع روني و لازم عليك اليوم تعرف كيفاه توقف معاه.....بوقرة جات عليه علامة إستفهام كبيرة الكل شافوها....... و من باعد غمز عنتر يحي هذا الأخير قال للشيخ و أنا شوفلي واحد يلعب كيما لامبارد .....قالو الشيخ حاجة باينة و كنت دايرها في حسابي على هاذك أنت عليك بخاطر سبيت لأنه يلعب كيما لامبارد غير الزهر ما عندوش و التالي راه يلعب في البارصا...... المهم بوقرة و عنتر فهمو الشيخ يتمسخر بيهم حكمو قرنية و بداة يشايخو مع بعض.

اللاعب يبدة ماهوش رايح يلعب اليوم ماشي لأنه مصاب كيما راها تقول الصحافة و لكن الحقيقة هو أن يبدة مازال حزين على فراق مغني و هو الشي إللي خلاه كل ما يلمس الكرة ينوض يبكي المهم إن شاء الله عودة سريعة يا يبدة

عثمان عريوات...عفوا ...قصدي الشيخ سعدان بدأ يتكلم مع بلحاج مي هذا الأخير كان مداير الكتمان و يسمع في لغنا ما علابالوش واش راه يقولو الشيخ

عبدون الذي أبهر الجميع بالمستوى نتاعو في التدريبات كان يظن في نفسه أساسي لكنه كان أول واحد في قائمة الاحتياطيين .... قال عبدون للشيخ و علاه راني رومبلاصو.....قالو الشيخ يخي قتلك من قبيل أطلع للشومبرة نتاعك غدوة إمتحان الباك واش راك قاعد تدير هنا الباك هو أهم شي و من بعد الباك راك تلعب البالو ....عبدون زعف طول راح للشومبرة نتاعو و بدأ مع الدوال الأسية و اللوغاريتمية ....المهم بالتوفيق ليك يا عبدون و لكل المقبلين على شهادة البكالوريا خاصة نجية و منى و سيمو.

صايفي لقلى روحو ثاني في الرومبلاصو بدأ يعيط و الله ما نقبل ...و الله ما نقبل....لعاب ولا حرام .....مها مها مها....المهم كيما يعضبو الذراري الصغار ......هنا سعدان راح ليه و فكرني في الرسوم المتحركة نتاع سلام دانك التي بطلها حسان و في فريقنا هو صايفي ....و قال الشيخ لصايفي ياك راك علابالك أنت هو السلاح السري و راني مدايرك غير و باه نخلط الحسابات للخصوم نتاعنا و خير دليل هو أن تحمل الرقم 10 ....هنا صايفي رضى و سلم على راس الشيخ و بدأ يفرح أنه السلاح السري.

في هاذي الأحيان شاوشي ما زال يضحك شاف فيه عثمان قصدي الشيخ سعدان و هو في أوج القلق نتاعو و قالو من الصباح و أنت تضحك و علاه رانا نضحكو هنا....بكل برودة أعصاب قالو شاوشي راني شفت الرزيلطا في الأنترنيت و نتوما من الصباح و نتوما تطلعوا و تهبطو وحدكم رانا رايحين نربحو 3-0...... تنهد الشيخ و قاللهم أيا خلاص الاجتماع روحو تتغداو.....كي خزر ما لقى حتى واحد يعني ياحسراه منين راحو يتغداو كان يحكي وحدو.

يا اميرة الموضوع باين منقول خاطر كتبتي خاصة نجية و منى و سيمو و ماكيش تقراي المواضيع

ياخي موشي حرام ماشي لا انا كننقل جميع الاعضاء ينقلون مواضيعهم